Morcegos en carballeiras

As carballeiras da reserva da biosfera Terras do Miño

Morcegos de Galicia leva estudando os morcegos da reserva da biosfera Terras do Miño desde o ano 2006.

En 2015 este estudo víuse impulsado ao comezar a coorganizar o campo de traballo insuaCAMP, xunto coa Asociación Galega de Custodia do Territorio e coa financiación da Deputación de Lugo, que permitíu afondar no coñecemento da fauna de morcegos ligada aos bosques aluviais chairegos e a súa contorna.

Froito deste traballo fíxose evidente a ligazón dalgunhas especies ameazadas de morcegos con bosques culturais e, en concreto, da importancia das carballeiras antigas para as especies Myotis mystacinus, Myotis bechsteinii e Nyctalus lasiopterus.

No ano 2022 comezamos un proxecto específico nas carballeiras da Reserva da Biosfera Terras do Miño, subvencionado pola Deputación de Lugo. Desde entón mostreamos carballeiras de 9 concellos da reserva, tanto con mostraxe acústica pasiva como facendo capturas con redes. Ampliamos o coñecemento das tres especies obxectivo e obtivemos datos para outras especies forestais de gran interese, aínda que non estean incluidas no catálogo galego de especies ameazadas: Myotis alcathoe e Myotis crypticus.
Ata o momento fixéronse mostraxes nos concellos de Begonte, Outeiro de Rei, Pol, Vilalba, Muras, O Páramo, O Corgo, Meira e Xermade.

As carballeiras da provincia da Coruña

En 2024 ampliamos o estudo de morcegos ameazados en carballeiras á provincia da Coruña, nun proxecto subvencionado pola Deputación da Coruña. Mostreamos 8 carballeiras e 2 sitios swarming. Obtivéronse importantes datos de distribución das tres especies obxectivo: Myotis mystacinus, Myotis bechsteinii e Nyctalus lasiopterus, así como doutras especies forestais de interese. Tamén permitiu identificar un novo sitio swarming e caracterizar a fenoloxía doutro xa coñecido.

Paralelamente, atopamos novas localidades para especies moi escasas na provincia da Coruña, como Myotis myotis e Miniopterus schreibersii.
En total, obtivéronse datos para 18 especies de morcegos, 8 delas incluidas no catálogo galego de especies ameazadas.