Ciencia Cidadá

Obxectivos

• Implicar á poboación local no estudo e conservación dos morcegos
• Ampliar o coñecemento sobre a distribución dos morcegos en Galicia

Descrición

A detección e posterior análise dos ultrasóns que emiten os morcegos permite identificar a moitas das especies galegas, contribuíndo a mellorar o noso coñecemento sobre como se distribúen os morcegos en Galicia. Nos últimos anos popularizouse o uso de gravadoras de ultrasóns debido á aparición de aparellos máis baratos e sinxelos de usar. A colaboración de voluntarios de toda Galicia permítenos obter un gran volume de datos moi valiosos para completar o atlas de morcegos de Galicia, de acceso libre, que xa é a referencia sobre información de morcegos en Galicia.

Como voluntario, podes escoller o teu nivel de implicación no proxecto, desde instalar/recoller detectores que che prestamos e enviarnos os datos obtidos para que nós os analicemos, ata usar o teu propio detector e incluso facer a análise dos datos.
Cada ano anunciamos nas nosas redes sociais cales son as zonas de traballo e realizamos obradoiros para formar voluntarios.
Se queres participar no noso proxecto de ciencia cidadá, escribe a info@morcegosdegalicia.org

Patrocinadores

Este proxecto está a ser financiado parcialmente pola Deputación da Coruña con acordo ás Axudas a entidades sen fins de lucro para o cofinanciamento de proxectos de actividades e investimentos no ámbito do medio ambiente.